ጥር 7/2018 የሳንኩራ ኮሙኒኬሽን
በስልጤ ዞን የሳንኩር ወረደ ወባጀ ጋር የ2018 ቶ/ኢ ባጀት ዘማን ዮሽትለኜ ቂንጥ አይዶ 06 ወሪ የውጥን ተረሻት ሂንኩም የሼሽትለኜይ ቂንጥ አይዶ ውጥን ያዙፎት ዴረ የወባጀ ጋሪ ዩመት ቃምቸ በትረከቡይ ኤት ባውጄይ አሻን።
ሉመት ቃምቸ ዴረ የትስናጄ የ2018 ቶ/ኢ ባጀት ዘማን ዮሽትለኜ ቂንጥ አይዶ 06 ወሪ የውጥን ተረሻት ሪፖርት ሂንኩም የሼሽትለኜይ ቂንጥ አይዶ ውጥን በሳንኩር ወረደ ወባጃ ጋር ተኬታይ አፈ ቡልሻን የሁርሚቴ የሸረፈቴ ሸሚማ አዘር ቀረባኔ ወባጀ ተረሼቢያን።
በዴረይ የሳንኩር ወረደ ወባጀ ጋር ቡር አፈቡልሻን የሁርሚቴ የሽፈ ዘምዘም በወባጀ ጋሪ የትረሼይ ተረሻት ሂንኩም ዬገሬ ውጥን ቱመት ቃምቸ ባዴኘ በውኖት አዞፉት የሮሬ ድጋዬ ያለይኮ የነቀሉ ቲዮን ሌገሬም በጥረኜ ሃለት ኢቄጥላን ዮነኮ አቻሎን።
ወባጀ ጋሪ በደረት አይዶይ ብዢ ከውንቸ ከውኖተክ በዴረይ የቴወደ ቲዮን ወባጀ ጋሪ ዩመቲ የበደርነት ማትሬገጬ በውኖትከ ዮረደይ ኡመት ቡልሚ አዘር የላቶዋ የፈየ መትንዳዳሬ ምከትቸ እንጂ ቢንጄ እትፈታነኮ ላሶት ሌገሬም ቡርቡር ብልቸ ያሴነኮ የሁርሚቴ የሽፈ ዘምዘም አትጄረቦን።
በዴረይ የትረከቡይ ዩመት ቃምቸ በፊልኑም ዴረይ ስረም ፈየ ዩነኮዋ ሌገሬም ቁምሮ ቂጥሎት ያለብይኮ የነቀሉ ቲዩን የትረሱ ከውንቸ ወክተክ በቄረ ሃለት አዞፉት ሉመት ላቶዋ ማትሬገጬ የሮሬ ድጋዬ ያለይኮ በንቀሎት ሪፖርቲዋ ዬገሬ ውጥን ስረም በፈየ ሃለት ተስናዶተክ ባሎ ዋቦን።
በዴረይ ሱልዋ ባሎ የነቀ ቲዮን ለነቁይ ሱልቸዋ ባላሎ ማትፋሀሜ ባቦት የቂጦ አትጋባት ቢለቆት ሎባጀ ጋሪ ዩመት ቃምቸ ሚዛኜ አሶኔ ወባጀ ጋሪ ያሼይ ዩመት ቃምቸ ዴረ ተከመላን።